سیٹھ ناؤمل ہوت چند سندھ کی تاریخ کا ایک ایسا کردار ہے کہ اگر ان کا نام حذف کر دیا جائے تو سندھ کی تاریخ ادھوری رہ جائے۔

سندھ کی تاریخ کتنی پرانی ہے اور کیا ہے اس پر بے شمار لوگ بہت کچھ لکھ چکے ہیں۔ یہاں تین ہزار سال قبل مسیح کے موئن جودڑو کے آثار بھی ہیں تو جنوبی سندھ کے شہر میرپورخاص میں کاؤ جو دڑو جیسا تاریخی ورثہ بھی موجود ہے۔ موئن جودڑو تو بچ گیا لیکن کاؤ جو دڑو کے ساتھ کیا ہوا، اس پر پھر کبھی لکھیں گے۔

بات ہورہی تھی سیٹھ ناؤ مل ہوت چند کی، تاریخ بتاتی ہے کہ ناؤ مل وہ شخص تھا جس نے سندھ پر انگریزوں کے قبضے کے لیے ان کی مکمل مدد کی۔

اس نے ایسا کیوں کیا؟

مالی فائدے کے لیے؟ انگریز سرکار کی جانب سے کوئی خطاب حاصل کرنے کے لیے؟ یا اس کے والد سیٹھ ہوت چند کے ساتھ میروں کی حکومت میں جو کچھ ہوا تھا اس کا بدلہ لینے کے لیے؟

ان تمام باتوں پر آگے چل کر بات کریں گے لیکن ایک حقیقت ہمیں ذہن میں رکھنی ہوگی کہ میروں کی حکومت کے خاتمے کے بعد جب سندھ میں انگریزوں کا راج قائم ہوا تو ایک جدید سندھ نے جنم لیا۔ شہری علاقوں میں روڈ راستے بنے، بجلی آئی، اسکول اسپتال بنے، ریلوے کے نظام نے جنم لیا، جدید نہری نظام اور بہت کچھ نیا متعارف ہوا.

بعض ناقدین کا خیال ہے کہ نہری نظام انگریز نے ریونیو حاصل کرنے کے لیے بنایا، ریلوے افغانستان تک فوجی ساز و سامان پہنچانے کے لیے اور اسکول و اسپتال براؤن صاحبوں (جو گورے صاحبوں کے حاشیہ بردار تھے) کے لیے۔

انگریزوں کی دیکھا دیکھی ہندوؤں اور پارسیوں نے بھی ایسے بے شمار فلاحی ادارے قائم کیے جس کے بعد مسلمانوں کو بھی ایسے ادارے قائم کرنے کا خیال آیا اور انہوں نے فلاحی اور تعلیمی ادارے قائم بھی کیے.

قصہ طویل ہوگیا، اب آتے ہیں اصل موضوع کی طرف یعنی سیٹھ ناؤمل ہوت چند کون تھے اور کیوں غدار وطن ٹھہرے؟

محمد عثمان دموہی اپنی کتاب 'کراچی تاریخ کے آئینے میں'، دوسری اشاعت مطبوعہ 2013میں ہوت چند کے حوالے سے لکھتے ہیں کہ؛

"اس شخص کی دولت جاگیر اور مرتبہ حاصل کرنے کی ہوس کی وجہ سے سندھ کے وطن پرست مسلمانوں اور ہندوؤں کو نہ صرف آزادی وطن سے محروم ہونا پڑا بلکہ غلامی کی صعوبتوں کو بھی برداشت کرنا پڑا۔ اس شخص نے انگریزوں کو سندھ پر قابض کرانے میں میران سندھ کے خلاف مکر و فریب اور دغا بازی کا دلیرانہ مظاہرہ کیا۔"

ناؤمل کے خاندانی پس منظر کے بارے میں لکھتے ہیں؛

"وہ 1729 میں کراچی شہر کی بنیاد رکھنے والے مشہور ہندو تاجر بھوجومل کا پڑپوتا تھا جو 1804 میں کراچی کے قدیم محلے کھارادر میں پیدا ہوا۔ اس کا باپ ہوت چند بھی ایک مشہور تاجر تھا۔ اس کا کاروبار نہ صرف سندھ بلکہ ہندوستان، افغانستان، ایران اور مسقط تک پھیلا ہوا تھا۔ سندھ کے جو ہندو تاجر میران سندھ کو قرض فراہم کرتے تھے ان میں اس کا نام بھی شامل تھا۔ اس کی حیدرآباد کے دربار تک رسائی تھی"۔

سوال یہ پیدا ہوتا ہے کہ اتنا بااثر ہونے کے باوجود ناؤمل کے خاندان کے ساتھ ایسا کیا ہوا کہ ناؤمل نے سندھ پر انگریزوں کا قبضہ کروایا؟

سیٹھ ناؤمل اپنی یاداشتوں تیسری اشاعت مطبوعہ سندھی ادبی بورڈ 1996 (یہ یاداشتیں 1930سے 1845) کے واقعات پر مشتمل ہیں.سندھی میں لکھی گئی یہ یاداشتیں بعد میں انگریزی میں ترجمہ کروائی گئیں.

1915 میں پہلی بار یہ کتاب انگریزی میں شائع ہوئی، صفحہ نمبر 89 پر لکھتے ہیں؛

"1831-32 کی بات ہے کہ نصر پور کے ایک ہندو مزدور کا بیٹا اپنے استاد کی سختیوں سے تنگ آکر ایک مسجد کے دروازے کے قریب جا کھڑا ہوا کچھ مسلمانوں کی اس پر نظر پڑی وہ اسے مسجد میں لے گئے اس پر غصے میں آکر ہندو دکاندار نے اپنی دکانیں بند کریں اور مسلمانوں کو سودا سلف دینے سے انکار کر دیا۔ مسلمانوں نے انتقامی طور پر لیاری میں موجود پانی کے کنوؤں میں گندگی ڈال دی۔ ان کنوؤں سے ہندو پینے کا پانی بھرتے تھے

دوسرے دن نورل شاہ نامی ایک سید نے ہمارے محلے سے گذرتے ہوئے گالیاں دیں۔ میرا چھوٹا بھائی پرسرام جو اس محلے کے بیرونی دروازے پر کھڑا تھا اس نے نورل شاہ کو نرمی سے سمجھایا کہ اس طرح کی بات مناسب نہیں، دونوں میں تلخ کلامی ہوئی اور جوش میں آکر نورل شاہ نے کہا کہ پر سرام نے میرے پیغمبر کی شان میں گستاخی کی ہے۔ مسلمانوں کا ایک ہجوم اکھٹا ہوگیا۔

بعد میں نورل شاہ نے قرآن گلے میں ڈال کر سندھ کے مختلف شہروں کا دورہ کیا اور لوگوں کو بھڑکایا۔ اس دوران کسی طریقے سے میرا بھائی پرسرام جیسلمیر (موجودہ انڈیا) منتقل ہوگیا۔ معاملہ اس وقت سندھ کے حاکم میر مراد علی تالپور تک پہنچا، مسلمانوں کا دباؤ تھا، میر صاحب نے میرے والد ہوت چند کو فرمان بھیجا کہ سیٹھ پر سرام کو حیدرآباد روانہ کیا جائے۔

پرسرام کراچی میں نہیں تھا۔ میر صاحب نے دوسرا فرمان بھیجا کہ ہوت چند خود حاضر ہو۔ میرے والد حیدرآباد پہنچے میر صاحب نے جھگڑے کے حل کے لیے معاملہ نصر پور کے قاضی کی عدالت میں بھیجا (نصر پور حیدرآباد سے کچھ فاصلے پر ایک چھوٹا سا شہر ہے). قاضی نے معاملہ سننے سے انکار کر دیا مسلمانوں نے اس کے بعد اچانک حملہ کرکے سیٹھ ہوت چند کو اغوا کرلیا. وہ دس سے بارہ دن مسلمانوں کی تحویل میں رہے جنہوں نے انہیں زبر دستی مسلمان کرنے کا ارادہ کیا (مراد یہ ہے کہ ان کی ختنہ کرنے کی کوشش کی) لیکن چوں کہ ان کی عمر 50 سال تھی اور ان کی ختنہ کرنا قرآن کے بھی خلاف تھا اس کے علاوہ مسلمانوں کا یہ خوف بھی تھا کہ اس کے نتائج خطرناک بھی ہوسکتے ہیں اس لیے وہ اپنے اس ارادے سے باز رہے ۔ بعد ازاں میر مراد علی کو پچھتاوا ہوا اور میرے والد کی بازیابی کا حکم جاری کیا۔ جس کے بعد میرے والد کو رہائی ملی"۔

اس وقت سندھ میں عام تاثر یہ تھا کہ سیٹھ ہوت چند کی ختنہ کردی گئی تھی، ناؤمل کی یاداشتوں میں یہ واقعہ خاصی تفصیل سے درج ہے ہم نے اس کا مختصر خلاصہ پیش کیا ہے۔

تقسیم سے قبل سندھ کی ہندو برادری بہت زیادہ امیر تھی اور سندھ کے وڈیرے اور جاگیردار تو چوٹی بات حکمران خاندان تک ان کا مقروض ہوتا تھا۔ لیکن اس کے باوجود انہیں وہ سماجی رتبہ حاصل نہ تھا جو مسلمانوں کو حاصل ہوتا تھا.

جیمز برنز کے مطابق؛ "سندھ میں ہندوؤں کو گھوڑے کی سواری منع ہے۔ اس لیے دولت مند تاجر بھی گدھے کی سواری کرتے نظر آتے ہیں. ہندوؤں کے لیے یہ بھی ضروری ہے کہ اگر کسی مسلمان کی سواری گذرے تو اس کے راستے میں ادب سے ایک طرف کھڑے ہوجائیں۔"

ممتاز دانش ور اور تاریخ دان ڈاکٹر مبارک علی اپنی کتاب سندھ خاموشی کی آواز میں لکھتے ہیں کہ سیٹھ ہوت چند کا خاندان سندھ کا ممتاز ہندو خاندان تھا اس لیے جب اس خاندان کے سربراہ کے ساتھ یہ ذلت آمیز سلوک ہوا۔ اسے اغوا کیا گیا، قید میں بھوکا پیاسا رکھا گیا اور بعض شواہد کی بنا پر اس کی ختنہ بھی کردی گئی تو ان واقعات کا اثر اس کے خاندان کے افراد اور سندھ کے ہندوؤں پر زبردست ہوا۔ یہ تھی وہ صورت حال جس نے یقیناً ناؤ مل اور دوسرے ہندوؤں میں عدم تحفظ کے احساس میں شدت پیدا کی ہوگی"۔

ناؤمل کی انا کو زبردست ٹھیس لگی ہوگی۔ غالباً اسی بنا پر اس نے میروں کی حکومت کے خاتمے میں انگریزوں کی مدد کی ہوگی. ہمارے خیال میں تن تنہا ناؤ مل پر یہ الزام لگانا کہ اس نے میروں کی حکومت کا خاتمہ کروایا زیادتی ہوگی۔

میران سندھ کی حکومت 3 حصوں یعنی حیدرآباد، میرپورخاص اور خیرپور میں تقسیم تھی۔ وہ کاروبار مملکت چلانے کے لیے ہندو تاجروں کے قرضوں کے محتاج تھے۔ ان کی کوئی باضابطہ تربیت یافتہ فوج نہیں تھی۔ ان تمام عوامل کے سبب انگریزوں کا سندھ پر باآسانی قبضہ ہوگیا۔

انگریزوں نے ناؤمل کی خدمات کے اعتراف میں اعزازات سے بھی نوازا. برطانوی دور حکومت کے ایک اہل کار خداداد خان اپنی تالیف لب تاریخ سندھ، پہلی اشاعت 1900، دوسری اشاعت 2009 مطبوعہ سندھی ادبی بورڈ میں لکھتے ہیں کہ؛

"سی آئ ای (CIE) کے لقب کا تمغہ جو انگریز سرکار نے سیٹھ ناؤمل کے لیے بھیجا تھا فرئیر محل عرف فرئیر ہال میں ایک شاندار دربار منعقد کرکے سیٹھ ناؤمل کو اپنے ہاتھ سے دیا۔ اس موقع پر انہوں نے جو خطاب کیا وہ خاصا طویل ہے ہم اس کا خلاصہ پیش کیے دیتے ہیں؛

"انہوں نے کہا، میں نہایت خوشی سے یہ تحریر تمہارے سپرد کرتا ہوں۔ تم نے انگریز سرکار کی زبردست خدمت کی ہے۔ ملکہ معظّمہ نے بڑی شفقت سے تمہیں سی آئی ای (کمپینئین آف دی موسٹ ایگزالیٹڈ آرڈر آف دی اسٹار آف انڈیا) کا لقب ادا کرکے عزت بخشی ہے۔ سال 1843میں جب سندھ کے میر صاحبان اور انگریز سرکار کے بیچ لڑائی ہوئی، اگرچہ اس وقت تمہیں سخت جانی و مالی خطرہ تھا۔ تاہم تم نے کوشش کرکے میر صاحبان سے متعلق ایسی ایسی خبریں اور ایسی تجاویز پیش کیں جن کے مطابق انگریز سرکار کے عملدار اپنے لشکر میں تبدیلی کرسکیں۔ ان خدمات کے عیوض تمہیں جاگیر اور پنشن عطا کی گئی."

ڈاکٹر مبارک علی اپنے مضمون "کیا ناؤمل غدار تھا" کے آخر میں لکھتے ہیں؛

"معاشرے میں اقلیت کا کردار بڑا نازک ہوتا ہے اگر اقلیت مالی اور اقتصادی لحاظ سے خوش حال ہو تو اس کے دشمنوں میں اضافہ ہوجاتا ہے۔ اکثر اقلیت کو وطن دشمن اور غدار کہا جاتا ہے۔ ایسی صورت میں معاشرہ اندرونی ٹوٹ پھوٹ کا شکار ہوجاتا ہے اور اقلیت ملک و قوم کی محبت سے دور ہوتی چلی جاتی ہے ہندوستان اور سندھ میں انگریزی حکومت کے قیام میں اقلیتوں کے عدم تحفظ کو بڑا دخل تھا۔"

ناؤمل کا انتقال 73 سال کی عمر میں 16 ستمبر 1878 کو کراچی میں ہوا۔ ان کی یاداشتوں پر مبنی کتاب کا دوسرا ایڈیشن آکسفورڈ یونیورسٹی پریس نے 1986 میں شائع کیا تاہم کتاب کے تعارف میں بھی انھیں غدار ہی لکھا گیا ہے۔

ضرور پڑھیں

تبصرے (9) بند ہیں

faraz quraishi Feb 27, 2014 12:52pm
سر کمال کا کالم لکھا ہے۔ مجھ جیسے لوگوں کے لئے جو اس شہر کے باسی ہیں اور اس شہر کے بارے میں کچھ نہیں جانتے یہ ایک زبردست تحریر ہے۔
Ghazanfar Abbass Feb 27, 2014 12:58pm
اختر بلوچ شاندار ۔۔۔ یقین کریں آپ کے بلاگ کا شدت سے انتظار رہتا ہے ۔ سندھ دھرتی کے اصل درشن تو ہم آپ کے طفیل کر رہے ہیں ۔ مولا آپ کو سلامت رکھے
میر کمال خان Feb 27, 2014 02:33pm
بہت ہی عمدہ کالم تحریر کی ہے بلوچ صاحب آپ نے ،نائو مل کا کردار سندھ کی تاریخ میں ایک تلخ باب ہے، نائو مل کو دائیں بازو والے دانشور غدار قرار دیتے ہیں چونکہ وہ سمجھتے ہیں کہ سندھ باب الاسلام ہے اور سندھ کے تاریخ میں غیر مسلموں کی کوئی گُنجائش نہیں ہے، نائو مل کے باپ کے ساتھ جو کُچھ ہوا تھا اگر ان میں سے کسی کے باپ کے ساتھ ایسا ہو تو پھر دیکھیں گے کہ ان کا ردعمل کیا ہوگا، سندھ پر انگریزوں کے قبضے کو کسی صورت درست قرار نہیں دیا جا سکتا لیکن یہ بھی ایک حقیقت ہے کہ میرانِ سندھ کے دور میں سندھ ایک پسماندہ اور غیر ترقی یافتہ ملک تھا، میر صاحبان خود اپنا نظام چلانے کیلئے ہندئوں سے قرضے لیتے تھے مگر اُن کی سماجی حیثیت غلاموں جیسی ہوتی تھی اور میر صاحبان کی باضابطہ کوئی تربیت یافتہ فوج نہیں تھی۔
Shamss Feb 27, 2014 03:19pm
Read new perspective about Naumal. It is an irony that British rulers who captured Sindh with their might also got assistance from locals in Sind and all over India. In India they ruled with thousands British soldiers but most of them were natives who collaborated with them. Development in India including Sindh they accomplished was for their own interest but as Ghalib also acknowledged they introduced advance technology in India. Mr. Akhtar’s article on Naumal is informative and quite interesting. His question about his loyalty with land or he was impetus in transforming Sindh more advanced (in comparison with feudal rulers who were not less ruthless). It was also worthy to note that blasphemy was being used in 18tth century for personal vendetta
Zulfiqar Ali Feb 27, 2014 04:44pm
Great Akhtar Sahib
اظہر نواز Feb 27, 2014 07:01pm
@faraz quraishi: اچھی تحریر ہے
یمین الاسلام زبیری Feb 27, 2014 11:05pm
جناب بلوچ صاحب اس تاریخی کہانی کو ہم تک پہچانے کا بہت شکریہ۔ سچ ہے کہ طاقت جس کے ہاتھ آجائے اسے خراب کردیتی ہے۔ مسلمان حکمرانوں کا ہندو ساہوکاروں سے رپیہ لے کر حکومت چلانے کا صاف مطلب ہے کہ ان کے لگان اور محصول کے نظام میں خرابی تھی، اور ان کے خرچ میں بھی بے احتیاطی تھی۔ جب حکمرانوں کا یہ حال ہو تو رعایا اور خاص کر وہ جنہیں نقصان اٹھانا پڑرہا ہو، اگر تبدیلی کی سبیل کریں تو کچھ غلط نہ ہوگا۔ اس کا تعلق مسلمان ہندو سے نہیں بلکہ شخصی حکومتوں کے طرز عمل سےہے
mahmood hassan Mar 02, 2014 07:17pm
Hindo muslim tafreeq muslim league ka saloogan raha hay kiya mazmoon nigar our dr mubarak ali pakistan k wajood ko bhi galat qarar denay ki jurat rakhtay hain tak such ka bool bala ho
mahmood hassan Mar 02, 2014 07:23pm
Monthly Al-Sadiq karaachi main kai saal pahlay 'cha faqat naoon mal gadar ho"k unwan se mazmoon aya tha......dilchasp baat ye k wo mazmoon kisi jadeed taleem yafta ka likha naheen tha.......