گلزار کا ناول’مرزا غالب‘ پاکستان میں بھی شائع

اپ ڈیٹ 19 ستمبر 2014
گلزار کے ناول کا سر ورق
گلزار کے ناول کا سر ورق
گلزار آسکر ایوارڈ حاصل کرنے والے واحد ہندوستانی نغمہ نگار ہیں — فائل فوٹو
گلزار آسکر ایوارڈ حاصل کرنے والے واحد ہندوستانی نغمہ نگار ہیں — فائل فوٹو

کراچی: ہندوستان سے تعلق رکھنے والے اردو کے نامور شاعر گلزار کے تحریر کردہ مشہور ٹی وی سیریل ’غالب‘ کو ناول کی صورت میں پاکستان میں بھی شائع کر دیا گیا ہے۔

اردو کے نامور شاعر، خوبصورت فلمی گیتوں اور مکالموں کے خالق، افسانہ نگار و ناقابلِ فراموش فلموں کے ہدایتکار گلزار آج بھی کسی نہ کسی نئے میدان میں اترتے ہیں اور وہاں بھی جھنڈے گاڑ دیتے ہیں۔

بولی وڈ اداکار نصیر الدین شاہ — بشکریہ ہندوستان ٹائمز
بولی وڈ اداکار نصیر الدین شاہ — بشکریہ ہندوستان ٹائمز

گلزار نے کچھ سال پہلے اپنے محبوب شاعر ’مرزا غالب‘ پر ایک ٹیلی وژن سیریل بنایا تھا جس میں نصیر الدین شاہ نے مرزا اسد اللہ خان غالب کا کردار ادا کیا تھا جبکہ اس میں شامل غزل جگجیت سنگھ کی آواز میں ریکارڈ کی گئی تھیں۔

مشہور شاعر گلزار نے کچھ عرصہ پہلے ہی اُس کامیاب ٹی وی سیریل کے منظر نامے کو ایک ناول کی شکل دی ہے جبکہ ان کی یہ تخلیق 'غالب' کے نام سے ہندوستان میں ہندی اور اردو میں شائع ہوئی جبکہ حال ہی میں اسے پاکستان کے ایک ناشر مکتبۂ دانیال نے شائع کیا ہے۔

مکتبہ دانیال ادارہ فیض، قرۃ العین حیدر، کیفی اعظمی، مشتاق یوسفی، جاوید اختر اور گلزار کی بھی نثر اور نظم کے شاہپارے شائع کر چکا ہے۔

ٹی وی سیریل مرزا غالب کا ذکر کرتے ہوئے نصیر الدین شاہ نے کہا تھا کہ وہ ایک اردو بولنے والے گھرانے سے تعلق رکھتے ہیں لیکن ان کی تعلیم مشنری اسکول میں ہوئی اور ان پر انگریزی کا اتنا غلبہ چھا گیا کہ وہ اردو کو بہت اچھی نظر سے نہیں دیکھتے تھے لیکن غالب کا کردار کرنے سے ان کو اردو کی صحیح وقعت معلوم ہوئی۔

مرزا غالب پر لکھے جانے والا یہ ناول ہندوستان میں روپا پبلی کیشنز دہلی پر دستیاب ہے جبکہ پاکستان میں مکتبۂ دانیال کراچی (فون نمبر 02135681457) سے حاصل کیا جاسکتا ہے۔

تبصرے (1) بند ہیں

dr yasin baig Sep 22, 2014 04:25pm
gulzar sb in urdu and ashu lal in saraiki r versatile and sensitive skilled of emotions,social norms,great work of indian poet,,