وفاقی وزیر برائے پانی و بجلی احمد مختار۔ — اے پی پی

لاہور: وفاقی وزیر برائے پانی وبجلی چوہدری احمد مختار کے بڑے بھائی چوہدری احمد سعید نے مسلم لیگ ن میں شمولیت اختیارکرلی ہے۔

احمد سعید نے پیر کو لاہور میں وزیر اعلٰی پنجاب شہباز شریف اور نواز شریف سے ملاقات کی۔

ملاقات میں چوہدری احمد سعید نے باضابطہ طور پر مسلم لیگ ن میں شمولیت کا اعلان بھی کیا۔

اس موقع پرشہباز شریف کا کہنا ہے کہ چوہدری سعید کی شمولیت سے ن لیگ کی مقبولیت میں مزید اضافہ ہو گا اور یہ قدم وفاق کے ایوانوں میں کسی زلزلے سے کم نہیں۔

چوہدری سعید اس سے قبل پرویزمشرف کے دور میں پاکستان انٹرنیشنل ائیرلائن اور پھر زرعی ترقیاتی بینک کے چئیرمین رہ چکے ہیں۔

انہوں نے 2005 میں زرعی ترقیاتی بینک کی سربراہی سے استعفی دے دیا تھا۔

وہ اس وقت جوتے بنانے والی ایک معروف کمپنی کے چیرمین کی حیثیت سے فرائض انجام دے رہے ہیں۔

سیاسی پنڈتوں کے مطابق چوہدری سعید کی شمولیت سے ایک طرف ن لیگ کوگجرات میں استحکام حاصل ہوگا تو دوسری جانب پی پی پی کی طرف سے تاجروں، صنعت کاروں اور سرمایہ داروں کو پارٹی کی حمایت کے لیے کی جانے والی کوششوں کودھچکا لگے گا۔