سپریم کورٹ بار کے سابق صدر بیرسٹر اعتزاز احسن۔ فائل فوٹو۔

لاہور: سپریم کورٹ بار کے سابق صدر بیرسٹر اعتزاز احسن نے کہا ہے کہ عدلیہ کو سیاست میں گھسیٹنا نہیں چاہیے اور تمام ادارے اپنی اپنی حدود میں رہ کر ذمہ داریاں ادا کریں۔

 ہفتے کو الحمرا ہال لاہور میں پینٹنگز  کی نمائش  کا افتتاح کرنے کے بعد میڈیا سے گفتگو کرتے ہوئے اعتزاز احسن نے کہا کہ سیاستدانوں اور عدالتوں کو اپنا اپنا کام کرنا چاہیے۔

 انہوں نے کہا کہ سندھ اور خیبر پختونخواہ میں اگر ججز کے خلاف مظاہرے کیے جائیں گے تو ملک میں لگنے والی آگ کون بھجائے گا۔

 ان کا کہنا تھا کہ متحدہ قومی موومنٹ (ایم کیو ایم) کے قائد الطاف حسین کو عدلیہ کے سامنے پیش ہونا چاہیے تاہم یہ الگ بات ہے کہ اس حوالے سے عدالت کا حکم بجا ہے یا نہیں۔

 واضح رہے کہ گزشتہ روز سپریم کورٹ نے الطاف حسین کو توہین عدالت کا نوٹس جاری کیا تھا۔

 عدالت کا کہنا ہے کہ الطاف حسین کا کراچی بدامنی کیس کی سماعت کرنے والے ججوں سے متعلق خطاب توہین اور دھمکی آمیز تھا۔