شاہ زیب خان۔ فائل فوٹو

کراچی: شاہ زیب قتل کیس میں زیرحراست ملزم سراج تالپور، شاہ رخ جتوئی کے خلاف وعدہ معاف گواہ بننے پر تیار ہو گئے ہیں جبکہ اس بات کا بھی انکشاف ہوا ہے کہ کیس کے مرکزی ملزم شاہ رخ جتوئی امارات ایئرلائن کی پرواز ای کے 603 کے ذریعے بیرون ملک فرار ہو گئے تھے۔

ذرائع کے مطابق سراج تالپور کے والد امداد تالپور کے اعلیٰ پولیس افسران سے رابطے ہوئے ہیں جس میں معاملات طے پا گئے ہیں اور طے ہوا ہے کہ سراج تالپور، شاہ رخ کیخلاف وعدہ معاف گواہ بنیں گے۔

ذرائع کا کہنا ہے کہ اس تمام معاملے میں اہم قبائلی سردار بھی اہم کردار ادا کررہے ہیں۔

سراج تالپور کو کل انسداد دہشت گردی کی عدالت میں پیش کیا جائے گا۔

ذرائع نے انکشاف کیا کہ شاہ رخ جتوئی امارات ایئرلائن کی پرواز ای کے چھ سو تین  کے ذریعے بیرون ملک ملک فرار ہوئے۔

اس حوالے سے مزید بتایا گیا کہ شاہ رخ جتوئی کو ایف آئی اے کے پائیسس کے سسٹم سے نہیں گزارا گیا جبکہ انہیں بغیر امیگریشن کے ٹرمینل تھری  سے ایئرپورٹ میں داخل کرایا گیا۔