آرمی چیف جنرل اشفاق پرویز کیانی۔ فائل فوٹو اے پی۔۔۔

راولپنڈی: آرمی چیف جنرل اشفاق پرویز کیانی نے کہا ہے کہ پاکستان، افغانستان میں پائیدار امن وسلامتی کا خواہاں ہے جبکہ افغان وزیر دفاع جنرل بسم اللہ خان کا کہنا ہے کہ پاکستان اور افغانستان کے درمیان دفاعی تعاون کو بڑھانا ضروری ہے۔

ڈان نیوز کے مطابق آرمی چیف جنرل اشفاق کیانی سے افغان وزیر دفاع جنرل بسم اللہ خان محمدی نے جی ایچ کیو میں ملاقات کی جس میں پاک افغان دفاعی تعلقات سمیت سرحدی صورتحال پر تبادلہ خیال کیا گیا۔

اس موقع پر آرمی چیف جنرل اشفاق پرویز کیانی کا کہنا تھا کہ پاکستان،افغانستان میں پائیدار امن وسلامتی کا خواہاں ہے۔

افغان وزیر دفاع نے کہا کہ کہ پاکستان اور افغانستان کے درمیان دفاعی تعاون کو بڑھانا ضروری ہے، دفاعی شعبے میں پاکستان سے رہنمائی لیتے رہیں گے۔

اس موقع پر دونوں ممالک نے دہشتگردی کو کچلنے کے لیے تعاون بڑھانے پر اتفاق کیا۔