اسلام آباد: سابق چیف جسٹس آف پاکستان افتخار محمد چوہدری نے کہا ہے کہ گزشتہ سال ہونے والے عام انتخابات کے دوران مبینہ دھاندلی کے الزامات بے بنیاد ہیں۔

سابق چیف جسٹس کا یہ بیان ایک ایسے موقع پر سامنے آیا ہے جب پاکستان تحریک انصاف دھاندلی کے خلاف اسلام آباد میں دھرنا دے رہی ہے۔

پارٹی کے سربراہ عمران خان نے افتخار محمد چوہدری پر مبینہ دھاندلی میں ملوث ہونے کا الزام عائد کیا ہے۔

دوسری جانب سابق ایڈیشنل سیکریٹری الیکشن کمیشن محمد افضل خان نے بھی ان الزامات کی تائید کرتے ہوئے کہا ہے کہ دونوں افتخار محمد چوہدری اور سابق چیف جسٹس تصدق حسین جیلانی اس مبینہ دھاندلی میں ملوث تھے۔

ڈان نیوز کے مطابق چوہدری افتخار کا کہنا تھا کہ عمران خان کے بیانات کی حقیقت کھل گئی ہے، اگر وہ اپنا موقف تبدیل کرتے ہیں تو آئندہ کا لائحہ عمل تیار کروں گا۔

ان کا کہنا تھا کہ اپنے خلاف لگائے گئے الزامات پر انہوں نے قانونی راستہ اختیار کیا ہے اور موجودہ حالات میں عدلیہ اپنا صحیح کردار ادا کررہی ہے۔

ان کا مزید کہنا تھا کہ عمران خان الزامات دہراتے وقت اپنا جواب بھی سامنے رکھیں۔