کوئٹہ میں ڈبل روڈ کے پاس دھماکے کے بعد جائے وقوعہ کا ایک منظر۔ رائٹرزتصویر

کوئٹہ : کوئٹہ کی ایک مصروف مارکیٹ میں بم دھماکے سے ایک ہلاک اور چودہ افراد زخمی ہوگئے ہیں۔

تفصیلات کے مطابق کوئٹہ کو سبی اور کراچی سے ملانے والے ڈبل روڈ پر یہ دھماکہ ہوا جس کی آواز دور تک سنی گئ۔

اس روڈ پر مشہور بڑیچ مارکیٹ کے پاس یہ دھماکہ ہوا جس میں چار پولیس اہلکار سمیت پندرہ افراد زخمی ہوئے۔

بعد ازاں دھماکے میں زخمی ایک بچہ ہسپتال میں دم توڑ گیا۔

زخمیوں کو فوری طور پر سول ہسپتال کوئٹہ منتقل کیا گیا جن میں سے کئی زخمیوں کی حالت اب بھی تشویشناک بتائی جاتی ہے۔ دھماکے سے جہاں ایک رکشہ مکمل طور پر تباہ ہوا وہیں اطراف کی دکانوں کو بھی شدید نقصان پہنچا۔

ابتدائی تفتیش کے مطابق دھماکہ ریموٹ کنٹرول سے کیا گیا اور دھماکہ خیز مواد ایک موٹر سائیکل پر نصب کیا گیا تھا۔