۔۔۔فائل فوٹو۔

میران شاہ: شمالی وزیرستان میں منگل کے روز ریموٹ کنٹرول بم دھماکے کے نتیجے میں کم از کم چار سیکیورٹی اہلکار زخمی ہوگئے۔

حکام کے مطابق، سیکیورٹی فورسز کی ایک گاڑی کو اس وقت ہدف بنایا گیا جب وہ اسپن وم سے میر علی جارہی تھی۔

حکام کا کہنا ہے کہ دھماکے کی وجہ سے گاڑی کو شدید نقصان پہنچا جبکہ چار اہلکار بھی زخمی ہوگئے۔

زخمیوں کو قریبی اسپتال منتقل کردیا گیا ہے جبکہ سیکیورٹی فورسز نے حملے کے بعد علاقے میں سرچ آپریشن کا آغاز کردیا ہے۔

شمالی وزیرستان پاک افغان سرحد کے قریب پاکستان کے سات قبائلی علاقوں میں سے ایک ہے جہاں قبائلی قوانین نافذ ہیں۔

علاقے کو پاکستانی طالبان اور دوسری انتہا پسند عسکری گروپوں کی آماجگاہ تصور کیا جاتا ہے۔